我都話我係火鳳凰嚟㗎啦！
我呢啲人才嚟㗎！嗰間咁嘅熱刺都唔識貨，明明喺白禮頓見我勁，就當最有前途新人咁簽返嚟，點鬼知又成日將我投閒置散，終於仲唔覺唔覺將我賣埋去英冠球隊㖭！
同舒寧咸踢波威威
哈！去到英冠嗰隊波，勢估唔到又有得出吓場噃，仲唔覺意打到去升班附加賽㖭！嘩！有機會升班喎！仲可以同偶像舒寧咸一齊踢波，咁我就喺賽前賽後攞部ViewCam出嚟拍呀拍，等第日個仔睇番先威吖嘛！
誰不知，原來注定我係要上位，真係點都㩒唔住，附加賽決賽，我一腳就幫隊波升班，啲人吹噓話嗰一腳值3,000萬鎊喎！我信㗎！總之啲人當晒我係英雄，仲連我拍低個啲藝術Video都話要出DVD，仲大賣㖭！所以話真係人行起運嚟都阻唔住嘅，何況，我真係有料喎！
上到英超，先至係我真正威水嘅時候，唔信你𠵱家去睇吓英超神射手邊個排第一，咩話，邊個係森莫亞？我有幾巴閉你都唔知？聽日講你知！
馬啓仁
愈講愈有味道，卻堅持「槌仔」先係正路。