收到Warwick大學寄來的畢業生季刊，正呀！離開學校4年多，遠在英倫的母校仍與舊生保持聯繫，用季刊告知我們大學最新動向，又關心畢業生現職狀況，希望我們能學以致用！
領隊任期愈來愈短
一手拎本季刊，睇睇母校新變遷同新研究先！咦！點解有幾版講足球，又咁大版費格遜呢？標題寫住「製造更好的足球領隊」！原來管理學博士，對英格蘭足球聯賽轉換領隊人選的次數，進行過研究分析。
研究由92至05年，英格蘭頭4級聯賽中有過678次的領隊人選變動，94位仍在球圈打滾、48位辭職、536位遭解僱，涉及360位領隊；任期也愈來愈短，由92年平均任期的2.7年跌至近年的1.7年。
數字反映球隊成績與領隊人選變動次數有直接關係，像曼聯及查爾頓有持續穩定表現，轉換次數相對較少。再睇落去，現任曼城領隊皮亞斯竟係我師弟！原來佢舊年完成商學院管理證書課程。睇到呢度，好懷念喺高雲地利嘅生活……。
馮嘉奇
碩士球員讀萬卷書，親身歷盡各國足球風情。