哈爾濱動力（1133）經過15個月大升浪後，今年7月頭喺9.90元受阻回落，噚日最低見6.30元，創近5個月新低，收市報6.58元，升2仙，有散戶想知，現價係唔係溝貨好時機？
「Yahoo討論區」內，有意溝貨嘅網友bluesmurf_hk問：「請問見底未？市升跌佢都係跌，基本因素係咪咁差？一個月內有冇力上番7.5元以上？」
clarksonhk比較樂觀：「應該差不多到底，街貨又唔多。基本質素幾好，6個月應可回7蚊。」另一網友killerwhaletrader則反對溝貨，佢認為，炒賣嘅最大原則係切忌愈溝愈淡。
哈動喺內地從事電力設備生產，由於市場競爭激烈，定單價格受壓，加上預期內地電力需求增長放緩，影響盈利前景。
上月底公布嘅中期業績雖然勁升近1倍，股價卻接連下跌，正係反映呢個憂慮。據哈動管理層所講，上述影響會喺兩年後至出現，集團現正大力發展毛利率較高嘅核電設備業務。事實上，目前國家正致力推動核能發電，核電設備未來有好大增長空間，哈動前景唔係咁差。
不過，純從技術分析，哈動現價超賣，9RSI底背馳，陰陽燭現錘頭，但呢啲只係短線反彈訊號，短炒博幾毫子未嘗不可，7.25元有阻力，執少少要走。
余文