等了又等，任天堂終於喺前日「WiiPreview」發布會度，正式宣布Wii喺日本推出日期為今年12月2日（歐美未公布），售價一如所料賣二萬五日圓（約港幣$1,655），實在相當之抵玩。Wii最矚目賣點，除咗Fing手Fing腳玩嘅體感遊戲外，仲有保持連線更新嘅「WiiConnect24」系統，以及下載舊有經典遊戲嘅「VirtualConsole」，暫定今年內會有30款遊戲供下載，包括紅白機、超任及N64遊戲，預計07年頭會加入PC-Engine、MageDrive等主機遊戲，下載費用由港幣$40至$66不等。
由於Wii整體架構源自GameCube，故能完全兼容舊有GC遊戲及手掣、記憶卡等周邊，Wii更打破家用機分區碼限制，以後日、美版遊戲均可雙向兼容，毋須再改機先玩到美版遊戲，不過Wii最終卻取消DVD播放功能，官方認為DVD機已普及，Wii可藉此減低主機成本。