亞視遊戲節目《以一敵百》將於本月25日晚推出，昨日主持人黃偉文（Wyman）聯同亞視行政總裁陳永棋等在亞視錄影廠出席拜神儀式，這節目將於下周安排試玩。
Wyman今次主持60集節目，日前他專誠到日本置裝，又搜羅歐洲品牌服飾，他說：「今次買衫六位數字走唔甩，亞視雖然冇津貼，但我都唔使蝕錢。近年好多有獎遊戲節目主持人扮到成隻嘢咁，着錯咗喜劇主持人嘅衫，總之我希望有型又摩登啦。」至於薪酬方面，Wyman說：「係一個大家都好有面嘅價錢。」
許冠文度期撐無綫
另外，今日娶新抱的許冠文獲無綫邀請主持新遊戲節目《一擲千金》，昨日他在旺角朗豪酒店錄影《志雲飯局》時說：「最近發生好多奇怪事，陳志雲、方姑娘（方逸華）都打電話畀我，叫我做主持，可能驚我仔女走晒，會有抑鬱。呢個節目都啱我，我係口水佬，得閒鍾意做吓棟篤笑，𠵱家有個遊戲節目，畀我做主持又可以講笑，又有得做財神派錢，幾啱我，𠵱家係睇時間，度吓期睇做唔做到。」
此外，許冠文談到女兒早前出嫁，兒子今日娶老婆新抱，心情應該興奮才對，但他對此說：「心情有少少緊張，仲覺得寂寞同恐懼，以前佢哋去外國讀書，每隔一段時間，好似暑假咁，都會返屋企，𠵱家就覺得兩個仔女正式唔會返屋企。談情都話會分手，點知同仔女都要講分手。」
採訪、攝影：楊潔雯、卓寶花、仇志德