北京控股（392）上周一向上爆，連升3日，高見14.90元，之後整固咗幾日。原本以為旗形整固後會再爆上一次，點知噚日因中期業績倒退95%而一度大插，最低見13.10元，好彩好快止跌回穩，最後陽燭收市，報13.70元，跌0.20元。
「香港討論區」內，網友StockBB問：「北京控股公布業績，盈利大跌，但此股似乎頗有潛質，係咪值得趁低吸納？」WINGER28回應：「盈利大跌是因為（燕京啤酒）股改，我就覺得$13樓下可吸納……」
北控盈利大跌，主要係因為旗下燕京啤酒股改，產生一次性淨虧損2.33億元，若扣除呢項特殊項目，北控純利應該增長14%。事實上，北控旗下公司股改已進行得七七八八，集團本身嘅注資同重組亦快將落實，今次盈利大跌，唔係因為基本因素變壞。噚日股價下跌，正好提供低位入貨機會。
走勢上，北控噚日大跌後以接近全日高位收市，圖表上造咗一支釘，證明早段嘅沽家沽錯貨。平均線排列、保歷加通道、MACD同RSI等指標，仍然未轉壞，𠵱家買入，風險有限，向上睇18蚊，跌穿11.98元止蝕，博得過。