剛剛從吉隆坡回港，第一件事跑返將軍澳工業邨「壹．蘋果」，跟前線的新聞記者索料，問問他們這幾天香港有些甚麼大事，老友們都話︰「你唔喺香港幾日，曾蔭權就出來話積極不干預已經不再存在。就連我們想見識孫柏文所謂『超級薩亞人』變身嘅機會都冇，你話幾掃興呢？」
掃興嘅人唔係我，係曾蔭權呢位流香港血嘅特首。記得舊年曾蔭權雄心萬丈，宣布要強政勵治，點都諗唔到他竟然咁快就勵到要走計劃經濟。畀佢連任，豈不是要搞文化大革命？
友人問︰「利世民，人家話積極不干預已經不再存在啫，使唔使去到咁盡先？」
且讓我拋書包
老實講，曾蔭權呢位仁兄做官咁叻，要佢搞計劃經濟應該無問題。從來計劃經濟都係官搞出嚟㗎啦，唔通係石頭爆出嚟嘅咩？不過，我話曾蔭權搞計劃經濟冇問題，係指佢一定可以搞到香港擁抱第三世界國家，令香港好快成為世界級三流城市。
若香港成功轉型成為三流城市，又點樣可以唔改變市民嘅心態呢？香港人出名勤力搵食，又出名政治冷感。未來三流城市嘅香港，你想勤力都冇咁多機會畀你去做嘢啦？啲人有嘢做，咪搞政治囉！不過，曾蔭權見識過長毛啲麻煩嘢都識驚啦，到時只需要叫公民教育委員會發動香港人民搞文化大革命，將長毛之流打成反動派，從敵人背後出擊，打倒一切睇唔起三流城市環保式生活嘅牛鬼蛇神。
利世人杞人憂天？又等我拋書包，同大家分享吓殿堂級大師嘅智慧。如果大家都係《壹周刊》同《蘋果日報》嘅忠實讀者，都應該會聽過海耶克嘅《通往奴僕之路》呢本書。話說1944年，海耶克知道納粹德國遲早會俾盟軍打敗，不過佢心中最大嘅憂慮，係蘇聯呢類集體中央指令經濟嘅心態，擔心有朝一日指令經濟會再一次將世界推向戰爭。所以海耶克仔細分析德國點樣由卑斯默（OttovonBismarck）嘅第一代指令經濟，走向納粹主義。結果不出海耶克所料，蘇聯成為二十世紀後半部對人類自由嘅最大威脅。
無端端走回頭路
有好多事實絕對不容狡辯。五年計劃係蘇維埃年代產物，過去一個世紀嘅結論就係，五年計劃等於餓殍遍野嘅恐怖經濟災難。近三十年來，五年計劃變成吹水嘢，大家都唔係好在意究竟中央搞乜。總之我有我搵錢，你有你做官，你要計劃就自己計劃到夠，反正來去都係空口講白話。吹水啫，咪由得佢哋囉。曾蔭權無端端去走回頭路，我真係唔知呢個人搞乜鬼。佢仲夠膽死去同人講佢個私人圖書館有海耶克嘅作品，我真係懷疑佢有冇畀心機讀過。計利世民話，其實曾蔭權藏書之中，佢真係睇得明嘅就只有TomClancy，如果唔係佢又點會諗嘢諗到好似小說作家咁，噏得就噏？
不過可能大家會話︰「咸豐年咁耐嘅嘢，點啃啊？」利世民向大家推介另外一本好書《CommandingHeights》。呢本書響98年寫成，算係新！再唔係，可以睇PBS以呢本書拍成嘅同名紀錄片，網上免費收看。講開又講，根據自稱為香港十大石油分析員孫柏文講，《CommandingHeights》其中一位作者DanielYergin寫嘅《ThePrice》，係所有想了解石油業嘅人必讀之書，而《CommandingHeights》更加簡明易讀，紀錄片版本就更加編排緊湊絕無冷場。
高高在上的曾蔭權啊，請你到以下網址︰ http://www.pbs.org/wgbh/commandingheights/hi/index.html睇睇。
利世民