我同男友仔都係海鮮狂，不過海鮮貴，試過兩個人畀嚿幾水整番餐魚蝦蟹，返屋企玩煮飯仔自己買自己整，煩到嘔仲要隊可樂送海鮮，懶浪漫加支白酒咩？Overbudget，咁食法乜情趣都無啦。如果$200有找，擦到個有5款海鮮嘅海鮮拼盤，仲要送埋兩杯白酒，呢餐平價浪漫，我Buy，你點睇？
記者︰方綺君
攝影︰陳偉強
模特兒︰Bianca&Steve
兩人份量絕對飽肚
$200有找就食到個海鮮拼盤？自己去街市買都唔止呢個價啦，我問過購物一向精明嘅阿媽，佢計過條數同我講︰「阿女，靚啲嘅生蠔每隻至少賣$30啦，夾埋都百幾喇，𠵱家仲有5款海鮮，間餐廳係咪畀Cheap貨你呀？」絕對唔係囉，「BCafe」推出嘅平價海鮮拼盤有4隻生蠔、4隻法國藍青口、4隻美國黃蜆、2隻海中蝦、1隻紅蟹，望落新鮮咬落滋味，講真兩人分真係好足夠，加埋兩杯白酒，絕對可以食到捧住個肚閃人。大廚Marco話：「餐廳供應嘅海鮮，全部都係時令貨。」信我，佢無吹水。
不過平還平呀，想食記得打電話預訂，等餐廳可以預夠供應數量，因為拼盤全日無時間限制供應，優惠期做到10月31日，計落仲有成個月有多，每個星期擦一餐都有着數。淨食海鮮好齋？啱吖，我都係咁話，好彩餐廳兼做Fusion菜，Marco又鍾意成日轉餐牌，西菜中式Present、中菜西式擺法、由普通Salad前菜轉做似足西班牙Tepas嘅小碟，無嘢佢未試過。今次有3款主菜同2款甜品做埋特價，價錢大眾化啲，人多喫完個拼盤嫌唔夠喉嘅話，畀多幾十蚊Order多一兩碟主菜囉，大大份確實好抵食。
1.海鮮拼盤$198（原價$398）
絕對足兩位用，生蠔、法國藍青口、美國黃蜆各4隻、海中蝦2隻、紅蟹1隻，份量十足。除生蠔外，其餘海鮮全部白烚凍食，一睇就知係新鮮貨，送多2杯白酒畀你啷口，仲想點？
2.蒜子釀豬手$68（原價$98）
日賣過50隻，Marco話︰「西班牙人最鍾意食。」豬手用香草醃過，釀入蒜子後要用食用繃帶紮住，再用上湯浸煮至熟透入味，風亁一晚後再炸，先做得出外脆內腍嘅口感。
3.炭燒澳洲羊仔柳$68（原價$98）
肉嫩澳洲羊仔柳，用紅酒和香草醃過夜，用高溫迫出羊仔柳多餘油份，再配煮上幾小時嘅濃濃燒汁，味道一流。
4.藍草莓奶凍$18（原價$38）
用忌廉、鮮奶、草莓一齊打成Cream狀，再用新鮮藍草莓打成果茸伴食，有淡淡藍草莓香氣，入口清新不會太膩。
5.燒蠔墨魚汁意大利飯$68（原價$88）
鋪面嘅係新鮮澳洲Tasmania蠔粒，雖則話係粒，但其實都好大隻吓，用白酒炒香至表面略焦，離遠都聞到香噴噴。自製墨汁意大利飯入口濃淡度剛剛好，唔會黐𣲷𣲷亦唔會太鬆散，我食到滿口芝士味。
6.朱古力慕思$18（原價$38）
賣相唔錯，用70%濃度嘅朱古力調製，味道較甘唔會過甜，照顧埋唔太嗜甜嘅客人，配上鮮芒果打成的果醬同伴碟嘅士多啤梨，味道好Match。
食客有Say：個個都話抵！
擺低$200食個海鮮拼盤，兩人均除要$100落樓，望落條數唔及啲甚麼$1雞、$1鴨咁抵，究竟食客點睇？好彩唔止我，問親個個食客都話抵啫。
搵食攻略
BCafe（27303626）
地址︰尖沙嘴山林道4-4A恆貿商業中心地下
營業時間︰星期一至六11:30am-3:00pm，6:00pm-1:00am，星期日及公眾假期6:00pm-1:00am
座位︰約60位
交通︰佐敦地鐵站E出口