今次投資版換吓口味，唔驚追寶尾，推介剛於周三歐冠盃主場勇挫皇家馬德里嘅里昂，再乘勇作客斬殺升班馬羅連安特。冷選方面，敲雷丁作客錫菲聯下盤兼W，希望波迷再有進賬。蘋果波神
華度及牽牛兄剛在周二聯手推介熱冷選皆中，小弟接棒當然希望延續勁勢，百幾場波選擇，始終覺得喺周六作客出戰嘅里昂最穩陣；其實個人考慮時並不理會周中佢哋打冧皇馬嘅戰果，事實上大家有留意該隊今屆雖然走咗廸亞拉呢個防中，但係人腳依然鼎盛，統帥侯利亞季初唔用八、九位世界盃球星，用𡃁仔主打，咪一樣掂，所以就算佢哋今場收起一部份主力，迎接下周中對布加勒斯特星隊嘅比賽，一樣冇有怕，有1.5倍單W絕對抵買。
新仔賓施馬靜靜雞冒起
講番佢哋隊波，里昂今季初再次成功地搶得連場不敗兼贏多和少佳績，其中一個要素可謂年僅18歲新人鋒將賓施馬嘅冒起；當大部份對方守將都專注於凍結里昂主力鋒將費特及卡維嘅時候，一度以翼鋒姿態出現嘅賓施馬，唔聲唔聲就轟入你一球，目前已經係隊中聯賽首席射手；周中被收起冇踢歐冠盃，呢場羅連安特有難咯。
睇里昂過去5場聯賽得到4勝1和，總共攻入咗12球嘅突出表現，今季應該可以繼續喺法甲聯做隻超班馬。話時話，里昂今屆作客盤路3戰全勝；上屆仲勁，作客有六成多贏盤率，反而主場得三成多，證明呢支法甲班霸作客仲抵博，冒進者博讓球主客和「客勝」啦！
羅連安特主場遇強失威
再講吓位於法國西部、屬環法單車賽賽站嘅西部海濱城鎮主隊羅連安特，迄今聯賽5戰只曾一敗，共計2勝2和1負，如此表現都可算超水準。但唯一敗仗正係於主場所取得，對手係上季聯賽亞軍波爾多，反映佢哋都係至叻喺實力尋常球隊身上發威，對住勁旅都係要乖乖哋，將3分拱手相讓，主場亦冇計。
雷丁熟晒路有力碎「錫」
冷選方面，就又係推介今季被我認定為長揸長有嘅升班馬雷丁。啱啱喺星期一睇到雷丁對曼城嘅英超聯直播，雷丁贏波之餘，最緊要係有隊形，而且踢得有板有眼，冇咗射手傑臣都唔係影響好大，反而中場嘅占士夏柏同埋薛維爾就真係好搶鏡。雷丁同錫菲聯近年喺英冠對到熟晒路，而錫菲聯今屆又冇乜點擴軍，試問點會唔俾雷丁教頭郭甫算倒呀！雷丁近屆同錫菲聯交手又有贏冇輸，近8次較量共取得6贏2和，平手盤高水值博外，進取可博單W㖭！
投資特攻隊金句
里昂今屆作客盤路3戰全勝；上屆仲勁，作客有六成多贏盤率，反而主場得三成多，證明呢支法甲班霸作客仲抵博，冒進者博讓球主客和「客勝」！