8個「劉德華」一次過同台獻技，實在令人看得目瞪口呆。深圳電視台早前為劇集《梅艷芳菲》中的劉德華角色挑選演員而舉行華仔模仿騷，8位來自不同地區、樣貌激似華仔的A貨共冶一爐，各自施展渾身解數，當中更以「山西劉德華」賀剛和「安徽劉德華」趙嘉偉鬥得難分難解，結果終孖住雙贏。
深圳電視台早前拍攝電視劇《梅艷芳菲》，由一向被指酷似梅艷芳的前亞視一姐陳煒擔演女主角，但因該劇描述阿梅一生，所以其好友「劉德華」、「謝霆鋒」甚至「近藤真彥」等人均會穿插劇中，故劇組把心一橫，索性扮嘢扮到底，就舉辦「香港十大明星超級模仿騷」選舉來挑選演員，但當中則以劉德華模仿騷最具娛樂性及爭議性。
台風造型學足
神州大地有13億人口，儘管華仔一張臉夠獨特，但冒牌A貨大有人在。近期內地網站「麥８音樂」，正流傳這段題為「劉德華模仿秀」的短片，於片中8位激似華仔的內地參賽者同台亮相，分別以華仔穿唐裝、長褸、牛仔裝及西裝等不同造型，一起咪嘴唱他的《我恨我痴心》和《謝謝你的愛》等歌曲，台風姿勢更是學到足，凌零發睇片也睇到嘩嘩聲，因為這個場面實在太壯觀，難怪惹來台下觀眾依嘩鬼叫。
據知當日賽事出現雙贏局面，由來自山西的24歲賀剛和安徽的趙嘉偉齊齊捧獎，前者在《梅》劇中飾演「劉德華」，趙嘉偉則參演另一套電視劇《上海灘後傳》，與再演丁力的呂良偉扮兩父子。
其實華仔模仿騷舉行當晚，陳煒為座上客兼頒獎嘉賓，昨日她跟凌零發提起那夜見8個華仔同台確感覺震撼：「其他參賽者都似華仔，但賀剛係最似、最有陽光氣息，佢本身個樣幾好，可以做明星，佢拍戲時仲特登減肥，瘦咗嘅輪廓就更似。」
