今年初啲房地產投資信託基金（REITs）炒到㷫烚烚，搞到個個地產商都出嚟話要分拆REITs上市集資，可惜鷹君5月分拆冠君REITs上市後就踩冧咗個市。
新地副主席郭炳聯噚日響業績記者會上，都說漏嘴，話新地年中決定無限期押後分拆創紀REITs上市，原因就係冠君上市時反應唔好，𠵱家要等市場對REITs嘅睇法好番先得，認真坦白。
至於近期商界熱話富豪捐身家，郭氏三兄弟就以私人事為理由，唔多願講。其實佢哋家族一直熱心公益，前日至話捐400萬畀廣東救助水災，唔想多講可能只係唔想咁高調啩，無謂沽名釣譽。