自從「湖南有色」來港上市炒到七彩之後，好多投資者都開始關心湖南，而湖南嘅企業亦好想繼續「有色」嘅神話。咁有供有求，馬時亨局長個金融團北上湖南交流，就自然好易成功啦。 馬局長前晚到咗埗，噚日主持洽談會開幕禮，徐憲平副省長都畀面嚟捧場。馬局長話今次往訪嘅金融界精英超過一百人，有商業銀行、投資銀行、創業投資私募基金、證券、保險會計、法律等各路人馬。總之，如果你想傾合作就一條龍服務，最緊要你肯嚟。