樓市發展，有時可以話係「成也炒家、敗也炒家」──如果唔係炒味濃，樓價一定唔會升得咁急；但如果大班炒家同時想甩身，樓價一定突然間質得好低──益街坊同累街坊，只係一線之差。冇炒家嘅地方，樓價相對穩定啲，升跌都有個譜，好似北角半山咁，利嘉閣分行經理余傑文說區內炒家只佔少數，而且集中喺大屋苑搵食，加上樓價銀碼起碼700幾800萬，大手持貨情況唔多，即使過去大半年樓市咁靜，二手樓價都好穩定。
余經理話北角半山樓以用家為主，啱啱海景台就有個用家為買心頭好，即使連租約都照買，諗住等份約年尾到期收番嚟自住。單位係中層B室，1277呎，成交價770萬，呎價6030蚊，算係市價；最吸引係全海景同埋罕有，物業前面係山坡、下面係學校，海景有保障，真係樓如其名。至於原業主96年11月以748萬買入，幾乎摸頂，接近10年後仲有22萬賺。