香港外國記者會個Ball今晚開Show，呢個Ball令好多人好期待，聽講唔少人舊年去完，即晚book埋今年嘅枱。
咁受歡迎嘅活動係經過艱苦經營，由構思到一手一腳搞呢個慈善舞會嘅簡思華（DavidGarcia）同八方講，初初好多嘢都係靠幾個核心委員，包括佢太太，同FatAngelo's董事總經理Andy等落手落腳，事前募捐、會場布置都係自己做。
佢話第一年叫啲人訂枱最辛苦，雖然啲錢係捐畀保良局，但好多人都唔知呢個係乜嘢舞會，亦好疑慮善款係咪真係捐出去。不過David冇諗過放棄，仲同八方分享咗件趣事。有次一個保良局屬下嘅小女孩見到佢紅鬚綠眼好驚，後來小女孩參加咗保良局語言培訓中心課程，上咗一輪活動班，成個人唔同晒，當佢第二次見到David時，竟然好主動咁走埋去，攞張相出嚟話要介紹佢隻狗狗畀David認識。咁嗰間語言培訓中心就係FCC、摩根大通同保良局合辦嘅，每年舞會上籌得嘅錢，有52%就係投資喺呢間中心。所以當佢見到小女孩有咁大改變，乜辛苦都唔記得啦。