與韋八少在飯局碰頭，乘機學嘢。今期《Newsweek》與《時代》封面，不約而同，以日本首相候選人安倍晉三為封面人物。九月二十日，日本自民黨選黨魁，黨魁會繼承小泉純一郎嘅領導人地位。如無意外，安倍晉三贏梗。佢祖父做過首相，父親做過外相，政治血統好到極，根正苗紅。但《新聞周刊》嘅封面標題係"TheWildCard"，意思係話佢「難估計、難預測，不廣為人知。」應該唔係指安倍晉三嘅身世，而係指佢嘅政策。
WildCard喺體育版一般譯為「外咭」，指不被挑選直接進入比賽，但可以通過資格賽而參加比賽之選手（如溫布頓網球大賽每年就有WildCard），美國棒球大聯盟每到九月尾就知道邊幾支球隊進入季後賽，唔係小組冠軍而可以參加嘅，就係WildCard球隊。呢個詞喺體育版見得多，我哋已經忘記咗佢原來嘅意思。
韋八少對各種體育活動遊戲之熟習，朋友之中無出其右，佢好耐以前在港台主持一個節目叫做「麻將法庭」，聽眾打電話問麻將甚至天九、啤牌、撲克、十三張之疑難，佢一一解答。韋八少話WildCard源出於美國撲克牌，譯做廣東話，最佳譯名就係百搭，譬如派牌五張，有7-Joker-5-4-3，呢張Joker就係WildCard，可以變成6，副牌立即成為straight（順）。因為撲克遊戲之中，WildCard有時威力無窮，直情係王牌，有型有格，點會係球賽之中「外咭」咁水皮？
聽完韋八少講，咦，或者《新聞周刊》封面係用雙關語（pun）喎，既指安倍晉三難以界定，難以捉摸，又暗示佢係一張「百搭王牌」，可以千變萬化。學英文要經常查字典，但如果明白英美兩國人民嘅生活用語，更可以明白多啲。韋八少自細就有幾個工人跟住，諸盤技藝由細玩到大，故此乜都識，我輩無此條件。譬如左丁山寫「隻馬跑梗頸四」，韋八少就話錯晒：「頭不能左右顧謂之痙頸（意梗頸），寫痙頸四先至啱！」