近排個市嘅成交好明顯多番，已經好耐冇見過200億元嘅低成交，但係個市升唔上又跌唔落，睇啲買賣盤，大戶又唔係冇動作，好似昨日咁，波幅雖然唔大，但其實鬥得好緊要，𠵱家大家似乎喺度等緊消息，嚟一次大搏擊。
睇番個走勢圖，恒指喺17500呈現「雙頂」形態，喺17000就見「雙底」，如果美國嗰邊冇大動作，睇怕港股暫時都會喺17000同埋17500之間上上落落。
東亞C輪3846：昨日個市「穿頭破腳」，啲藍籌股冇乜表現，「跌市奇葩」有1隻，就係最早入大陸開荒，𠵱家進入收成期嘅東亞（023），睇吓東亞今年嘅股價走勢同大行嘅研究報告，就知道東亞升咁多都係因為班基金佬對東亞流晒口水。東亞嘅前景點睇？一個「好」字。
東亞昨日高收35.80元，逆市升2.4%，隻C輪3846報收34仙，5.6倍嘅有效槓桿率，升咗15.2%，有成6個幾月先到期，溢價10.1%，絕對唔貴，短炒長揸都啱，正股上試40元應該唔使等好耐，升到嗰個位，隻輪應該唔會低過60仙，可以買番啲，正股跌穿20日線止蝕。
和黃P輪9207：上個禮拜介紹過隻9207，和黃（013）跌落去69元邊頂位，反彈咗1日就冇力，昨日跌番落69.60元收市，未來兩日若見和黃跌穿69元，可以再出擊，和黃見68元，9207睇53仙。
大家要記住，正股若高開，唔追9207，下破69元買入後，以正股69.60元做止蝕位，正股若跌唔穿67.80元，沽出獲利。
俊 樺