自由黨真係富貴黨，一出門就遇上大風大雨，搞到班機大delay，前晚12點先抵埗，要摸黑入北京城，害到班行家冇啖好食。不過國家叫到，富貴黨班醒目仔幾辛苦都唔會投訴啦。八方喺啓程前問張宇人，會唔會同北京傾選委會問題，佢話都冇乜好傾喇，飲食界嘅11人鑽石名單今年初已經協調好晒，如無意外，佢做會長嘅香港飲食業聯合總會會全取11席，咁即係冇預民主派啦。
張宇人話自己有紀錄可尋，唔係作大，第一屆選委佢協調張名單全部勝出，上次輸咗一席畀伍德良，今次白鴿黨黨主席夫人陳樹英出馬，想爭番啲位，但係睇嚟真係唔易。張宇人咁有信心，大家不妨等到12月10號選舉日先剝佢棚牙。
至於邊個會出選，遲吓記者會先宣布，張宇人𠵱家已經度緊聯合政綱、街板設計、宣傳刊物，好似真係穩操勝券。