彤叔鄭裕彤間周大福，噚日慶祝大中華區第500間分店開幕，佢嗰位賢侄──亦即周大福執行董事、單位話事人之一鄭錫鴻（圖右）話，周大福𠵱家每年銷售額達到10億美金，仲預期中港兩地人均鑽飾消費，會較舊年增加10%至12%。 鄭董又話，佢哋對珠寶業前景十分樂觀，已經計劃喺今年之內，將內地的分店數目由445間，增加到500間，而且為咗趕及10.1黃金周嘅來臨，單喺9月份就會開多幾10間……睇番佢哋啲舖，開到去烏魯木齊同埋蒙古，你話邊夠彤叔做呢？