出道四年的at17舉行過不少小型音樂會，本月底她們於亞洲國際博覽館舉行一場大型演唱會，不過她們事先聲明，演唱會不會有煙花、爆破及性感歌衫，入場的fans只齋聽歌，因為她們只是以歌會友。
入行四年的at17終於在本月底舉行演唱會，更將演唱會取名為「at17SingSingSing演唱會」，at17的盧凱彤（Ellen）及林二汶表示在得悉將舉行演唱會後便不停向身邊的朋友、歌迷查問最想看她們演出甚麼，最後得到的答案都是一樣，Ellen說：「好多歌手都希望喺演唱會上加插啲以往冇做過嘅表演畀大家睇，咁我哋咪問身邊嘅朋友同fans想睇我哋表演乜，點知個個都只係答兩個字『唱歌』，所以我哋咪singsingsing囉。」
冇煙花冇爆破
二汶又指每次聽到這個答案都會感到十分高興，因為她知道喜歡at17的人都是一心想聽她們唱歌的，她說：「起碼啲人唔會話想睇我哋着低胸衫，我相信我哋着都冇人想睇啦，做歌手有一班鍾意聽自己唱歌嘅人已經夠啦。」所以在演唱會上不會有任何煙花及爆破效果、性感歌衫也欠奉、就連最基本的升降台相信都不會出現。
自知為人霸道
at17入行不經不覺已有四年時間，Ellen與二汶感情相當好，似乎可以打破組合之間總會不和這個定律，原來二人的不和早已於第一張唱片未推出前已經發生。
Ellen說：「嗰時日日對住大家，後來唔知做乜無啦啦憎咗對方，於是每次做完騷上到車就唔同對方講嘢。」二汶補充說當時自己為人霸道，她說：「我以前真係以為個個人諗嘢都一樣，有時Ellen睇法同我唔同我咪黑面囉。」最後二人要由經理人調停紛爭。
採訪：李珮洳
攝影：仇志德
髮型：DerrickNg,[email protected]
Styling：樂菲
