自由黨打正旗號反銷售稅，搞完大遊行後，又由主席田少發功，同財政司司長唐唐展開筆戰，可惜煲呔攬硬銷售稅，一啲面都唔畀自由黨噃，田少有幾激氣？唔使問都知啦。
唔知係咪真係仲谷住道氣，自由黨訪京團噚日同國務院港澳辦副主任陳佐洱會面時，田少就乘機「篤背脊」。話說喺講緊自由黨同政府關係時，佢話希望政府推出政策前可以多啲諮詢佢哋意見，田少仲特別以銷售稅為例，話政府推銷之前，佢哋毫不知情，「毫不知情」呢四隻字真係有骨㗎！
其實自由黨同政府關係素來麻麻，田少噚日都認㗎，話經過一輪磨合之後，同政府關係雖然係有改善，但都承認雙方關係仍有改善空間；換言之，大家都係就住就住，未係知交好友啦。田少向來有嗰句講嗰句，既然佢支持特區政府搞執政聯盟，噚日有機會見到陳佐洱同統戰部部長劉延東，都好大膽向領導人反映意見。田少仲話佢哋只不過係想協助特區施政啫，希望外界唔好以為佢哋要求同政府分權。其實外界有乜睇法有乜緊要，最緊要係煲呔唔覺得你搶佢嘢就得喇。