北大人雖然時不時就民主同普選呢啲中方視為涉及一國嘅大問題，由神州伸出雙手到香江，摷吓呢樣摷吓嗰樣；又或者失驚無神揼個「釋法」玩具落嚟，惟恐香港呢個乖仔太悶冇嘢搞。好彩乖仔至今依舊維持「司法獨立」嘅獨特個性，冇跪低。作為司法界嘅揸Fit人，律政司司長黃仁龍自然好自豪，難怪佢就算身在遠遠嘅華盛頓，都話為香港法治引以為榮。
查實仁龍仔都算一個幾感性嘅人，睇佢上任律政司司長前，因為唔滿意人大釋法，自告奮勇走上街示威，就知佢內心真情嘅一面。到佢上任當日，又好誠懇咁話，唔希望香港再有釋法，好多人都俾佢感動，所以民望一直唔差。
香港係「亞洲倫敦」
仁龍仔噚日去到美帝國嘅「布魯金斯研究院」（BrookingsInstitution）致辭，佢自揭今年1月，以司長身份出席法律年開啓禮，同終審法院首席法官李國能及其他法官，齊齊着住傳統英式長袍，戴住假髮，一齊肅立聽現場奏中國國歌時，嗰一刻，令佢非常感動難忘。不過佢始終都無流眼淚，可能係男兒有淚不輕彈。
既然係外訪hardsell香港法治，咁梗係要講講本港實際法治情況係點。佢話回歸以來，有關基本人權同自由嘅訴訟案雖然增加咗，但唔表示香港嘅制度有問題，相反，呢樣嘢正好彰顯《基本法》中有關人權保障涵蓋範圍極廣泛喎。佢仲估計法院案件激增，可能因為法院用中文審訊情況日漸普遍，拉近法院同市民距離。仁龍司長仲形容香港係中國最國際化同奉行普通法制度嘅城市，所以如果上海係「中國嘅東京」，咁香港就係「亞洲嘅倫敦」。
哥頓胡撐2012普選
講完法治，都要幫煲呔sell吓政改先得，否則返到香港可能要被罰扭耳仔。仁龍仔力撐政府會全力推動政制發展，希望最終達至普選，而有關下一步工作，則要交由策發會處理喇。唔知美國友人知唔知策發會係乜？
呢個策發會嘅管治及政治發展委員會咁啱噚日又搞咗個工作坊，畀委員暢所欲言，不過據知鍾逸傑同譚惠珠等人都係各自表述；佳叔仲話會再喺外面搵一啲學者同專家參與討論。
八方最希望佢搵胡應湘傾吓喇，因為出名保守嘅哥頓胡接受飛哥喺now台訪問時，竟然公開贊成2012普選，同民主派同一陣線，認真罕有，唔怪得飛哥都拍爛手掌。哥頓話自己只係唔支持1997過渡後馬上普選，不過哥頓講嘢，唔好信晒。