好多新樓都只係大喺個會所度，單位實用率愈整愈低，再係咁縮水落去，就嚟連十幾廿年嘅單幢樓蚊型單位都比唔上。其實，好多舊樓都有唔少人捧場，價錢又夠平，只係輸蝕在外表欠吸引力，所謂人靠衣裝，近年好多舊樓已經陸續換新裝，就算樓價無法即時彈升，交投量都一定會增加。
筲箕灣係港島東舊樓集中地，美聯區經邱鵬話區內名廈之一嘅康華大廈，搞咗成10個月嘅維修工程啱啱完工，今個月過唔夠一半已經有3單成交，相當於翻新前一個月嘅交投量，平均每戶夾咗3萬銀搞嘅大工程，總算初見成效。
3000零蚊呎 市區邊度搵
邱區經報咗兩單成交料，371呎單位賣咗115萬，另外416呎單位成交價126萬元，呎價都係3000零蚊，算係市價；同類單位市值租金去到6000幾7000蚊，回報超過6厘。𠵱家大概有廿零個放盤，呎價都係3000幾蚊。康華大廈出名除咗地點方便之外，實用率接近八成，比同區大部份單幢樓都見使。新樓賣得貴，其實二手市場仲有好多平嘢揀。
電郵地址：[email protected]