側田前晚喺會展舉行「聽側田唱音樂會」，仲請嚟任賢齊、黃品源同梁漢文做嘉賓。側田好識做，成晚賣廣告，不時攞起贊助商嘅蒸餾水嚟飲，就連小齊同品源上台合唱嗰陣都叫人哋攞住支水舉杯。
阿媽聽歌感動
獻唱《明星》之前，側田忍住眼淚行到觀眾席向媽媽講：「我4歲嗰陣同妹妹一齊唱過呢首歌畀你聽，你一手湊大我哋，𠵱家我有能力湊番你。」側田媽聽完之後即刻同個仔擁抱，場面感人。到最後致謝辭時，側田先後多謝主辦單位同工作人員，仲話：「我要特別多謝我嘅髮型師，係咪估唔到呢？我都有髮型師，得嗰幾條『滴水』。」
事後小齊同品源講到佢哋嚟緊嘅紅館演唱會，品源話如果要激舞摸胸同自摸下體，佢只可以借位搞掂，小齊就直情sayno。同樣喺下個月開騷嘅梁漢文就話自己不嬲都唔係引起其他人性幻想嘅人，不過做完今次演唱會後可能上榜，佢話：「fans鍾意摸同搣我都得，搣邊度就搣邊度囉，我度度都買重保險，小漢文都照買多份！」另外，側田噚日喺中環出席傳奇歌王LOBO嘅香港演唱會記者會，兩人仲互贈CD㖭。
