今日想同大家講吓一啲馬會精心設計嘅特別彩池好似六寶同孖膽，其實喺投資嘅角度，呢類莊家抽水穩執嘅項目，根本唔值得推介畀大家，加上投注額細，所以除非遇上有多寶，否則大家都係少掂為妙！
馬會設計呢類項目，當然係想保障一部份收益，呢類莊家穩贏嘅投注，愈多人買佢哋愈賺得多；所以佢哋開盤大員精選嘅場次，當然希望係受歡迎兼唔易估，咁樣一旦有多寶累積，先至會吸引更多人落叠。好似禮拜三晚孖膽，票數一面倒側晒落曼聯，邊個估到佢哋上半場會同低班半嘅些路廸打成2:2；加埋里昂半全場皆勝皇馬2:0，結果130多萬投注無人中，馬會連抽水加埋做善事，攞走30萬，剩番100萬拎番出嚟畀大家喺足協盃再玩過，你話抵唔抵玩嘞！
六合彩都話彩池大，有得刀仔鋸大樹，六寶孖膽每次得一百幾十萬投注，實在唔值得太認真；要撞吓手神者，其實買孖膽反而要攻上半場，因為好多人唔會擺太多注數落上半場嗰度，無形中一爆冷已提早玩完，大圍中又唔會好分，不如喺半場賽果諗吓博懵好過；至於六寶彩池更細，大家都知我唔喜歡推介大家買主主/和主，唔通場場博主客/客主，博執幾十萬咩。
波膽過關限派200萬搵笨
順帶一提，有一樣嘢想替波友出頭嘅係馬會實在「店大欺客」，足智彩一季投注額高達300多億，點解去到今時今日，仲可以買波膽過關限派200萬呢（2-3關計）？有啲波友都會一條波膽3串1過關，買10蚊發吓夢博收幾百甚至幾千萬；但用周中例子，般尼勝4:2（50倍）串修安聯3:3（50倍）再串布加勒斯特星隊勝4:1（100倍），其實全中應收250多萬，但現在實收200萬；唔通馬會認為足智彩就唔可以畀波友有夢想，你哋一定要以大博大？文：蘋果波神