斯富街timeplus商場，99個舖位話咁快喺兩個禮拜內租清，個場預計11月入伙，咁商戶就可以食正聖誕節同新年嘅零售旺季啦。
租得咁成功，大業主禹銘投資梗係要請出力嘅代理食番餐，主席馮永祥果然夠面子，連一向爭生意爭到出晒面，幾乎勢不兩立嘅美聯同中原都拉得埋一齊慶功。
美聯派工商舖行政總裁黃子華同舖位部營業董事盧展豪出席，中原就有商舖部總經理潘志明到場；其他代理有港置、英聯地產同百樂行。
講番個場，美聯話有一個賣手錶[!9DEF]承租1樓兩個舖位，合共712方呎；另外有兩個租客各自承租兩舖，一個租相連，一個則打對面。