曾經打破全球最高轉會費紀錄嘅巴西翼鋒丹尼臣，近年事業認真潦倒，今年仲俾球會波爾多棄用，變咗做自由身「量地兵」。不過，今季喺英超脫胎換骨嘅樸茨茅夫，最近已經邀請咗呢位28歲球星試腳，如果表現好嘅話，隨時有機會做長工喺英超鹹魚翻生。之但係我求大俠有啲擔心，唔知呢條「濕手巾」獨食仔，會唔會拖垮「老樸」咁順嘅開「咧」成績？
看重虛榮感累事
丹尼臣今次有機會去英超都算係執番身彩，本來同一間沙地阿拉伯球會艾爾尼沙傾掂數，諗住過檔掘金，𠵱家知道「老樸」有興趣，仲唔嗱嗱聲扭軚。不過，球迷都知丹尼臣一向最鍾意扭，皆因喺球場上「扭」開吖嘛。
老實講，我求大俠對佢印象麻麻，雖然佢「插花」技巧高超，連曼聯嘅「C朗」見到佢都要嗌聲前輩。但係丹尼臣係個鍾意show-off嘅球員，記得98年佢仲係巴西聖保羅球員時，知道西班牙貝廸斯對自己有興趣，佢竟然同球會講，一定要對方破全球最高轉會費收購佢，等佢可以打破同胞朗拿度嘅紀錄，結果貝廸斯真係笨，出咗2,200萬鎊買佢。從中得知，虛榮感相當重，希望佢𠵱家大個仔生生性性，幫「老樸」再上一層樓啦！
「阿仙奴啱啱買咗個巴西新仔又係叫丹尼臣，扭唔扭得就未知，但係樸茨茅夫如果派出『正牌丹尼臣』落場表演腳法，作為球迷角度又確實眼界大開嘅。」