一間機構值幾錢，除了有形嘅資產，仲有無形嘅品牌價值，若果品牌聲望高，呢筆無形嘅價值計起數嚟都好襟計，所以近年各大小機構都好積極咁推行企業責任，又搞慈善、又搞教育，捐錢更係少不免。呢樣嘢，郭氏兄弟檔新鴻基地產都做得好足。
近月，廣東水災災情都幾嚴重，抗洪救災需要錢，新地二話不說攞400萬人仔出嚟，幫啲中山市及廣州市花都區嘅受災居民，等佢哋可以度過難關，重建家園。
噚日，佢哋就搵咗執行董事鄺準，帶咗一團管理層人員，親身到中山及廣州，將捐款支票，分別交畀廣東省人民政府僑務辦公室主任呂偉雄，以及廣州市花都區人民政府副區長樓旭逵，既然專程到災區，鄺準亦順道探望兼慰問吓一班災民。攞咗出嚟嘅錢，幫到人之餘，最後都袋番喺新地呢個品牌上。