「如無意外」，喺12月轉莊畀梁伯韜嘅電訊盈科（008）今日公布半年業績，盤數經已唔係傳媒、分析員同埋市場焦點，大家關心係單「未解決」嘅賣盤Deal有咩進展。咁8號仔中人又點睇老細賣枱，擔心啲咩呢？上電盈個職工總會網站討論區一窺佢哋呢幾個月的心情！
最怕再次大裁員
6.19事變（停牌話要賣）翌日，電話仔留言「二世祖賣家產……只怕再整一鑊裁員！」資深員工就話「公司賺錢公司的事，公司蝕錢伙記有事，佳仔唔好搞事……」
之後，管理層搞咗個員工大會穩定軍心，但依奧強話「今時今日咁樣形勢，仲做乜鬼布導大會，收皮等開盅啦。」炮仗王就話「以為布導大會有咩堅料，講來講去都係三覆被，甚麼前景、中景、遠景，仲以為講影相……」呢個時候有啲人嘅焦點就去咗賣得成可能係每股$6.3私有化，水晶球話「呢間公司不斷放風話6個2……我都一於死跟，哨牙仔唔會老點啩？」
7.11謎底揭盅翌日，對於李澤楷派特別股息畀小股東，潮洲佬留言「三毫幾就想贏到掌聲？呸！12蚊買入到𠵱家（跌剩）1蚊，我都未歎過一聲，想用三毫幾來換取掌聲？收起佢留番用嚟買……」
咁點睇梁伯韜呢個「白武士」？電訊老人話「哨牙仔離場係被迫……梁氏係被安排入局的傀儡……」Ex-Staff就話「當年街街借$買HKT，之後PCCW一身債；𠵱家韜韜又係借錢買PCCW，仲有咩可賣？」
韜韜日後有咩賣
後來副主席蘇澤光份新薪酬合約「離奇」曝光，小小話「jackso做過啲乜？對PCCW有乜貢獻？可以加25%人工？」而無着數就留言「拿拿林收埋當年簽嗰份合約，容乜易流咗出街登報紙……」至於大家嘅心情，老電佬就好「禪」咁做咗個總結「由𠵱家到12月有好大變數，可能轉手幾次都得，唔好諗咁多……」唔知8號仔班「現役」管理層睇到呢啲員工心聲後，會唔會動惻隱之心安撫吓佢哋呢？
報料電郵：[email protected]