平時返學去開邊度食嘢呀？「隨你鍾意吖。」九唔搭八，我問緊你嘢喎，「都話隨你鍾意咯。」初頭真係俾呢位樹仁輔導及心理學系3年級生Hoddy搞到一頭霧水，問清楚先知佢講緊嘅係「隨您鍾意」呢間日本料理店。噓，齋聽店名就夠晒噱頭，咁食物又係咪隨你鍾意，點乜有乜先？Hoddy話：「哈哈，咁又唔係，不過食物款式都算選擇多，款款都咁好味，價錢又夠大眾化，最緊要係附近有Van仔搭方便返學嘛。」舖頭下晝時間落場，Hoddy多數落嚟食Lunch：「佢哋嘅午巿套餐好抵，壽司好好味，我最鍾意食三文魚卷。」正想叫廚師宮先生整番客三文魚卷影相交差，點知佢一早預備好食物，睇番仲要係餐牌未有嘅。Hoddy見有新菜式，梗第一時間試味啦，結果佢首選芝士海鮮焗薯茸，「芝士味濃用料又足，食大半個已經好飽肚，下次幫襯一定會再叫多次。」無吹水，薯茸香到連我都想食埋一份，其他新菜式味道都唔錯，勝在有心思。臨走，Hoddy補多句：「天后唔多日本食肆，呢度真係唔錯，最緊要可以畀我哋班樹仁同學仔聚腳嘛。」
記者：蘇振鵬
攝影：周旭文
芝士海鮮焗薯茸$28
Hoddy至愛，三文魚、帶子、蝦、蟹柳、蘆笋等切粒，加薯茸、芝士一齊焗，Hoddy：「啖啖海鮮，一啲都唔齋，芝士味仲好濃，似食芝士焗海鮮多過食焗薯茸。」
芒之卷$33
大大件三文魚壽司，面頭鋪芒果蟹子，味道清新唔膩。Hoddy：「芒果好甜，同蟹子味道好Match。」
火燄三文魚$18
燒過的三文魚，加鮮魚子、芥末汁。Hoddy：「食落香口，口感幾特別，同出面普通三文魚壽師好唔同。」
隨您鍾意（25707933）
地址：天后電氣道79號地下