中華煤氣（003）噚日中午公布中期業績，由於來自地產收益減少，半年純利跌咗19.7%，降至25.09億元。下晝開市後，股價一度插穿18蚊，低見17.86元，好彩3點後好友積極反攻，收市上番18.22元，只係微跌4仙。
中煤業績令人有啲意外，喺「香港討論區」內，網友kk1965認為：「地產未入賬，下半年入番數，全年計條數在年尾會好好。」TT2.0亦認同中煤係長線佳選。
中煤嘅香港業務增長穩定，近排土瓜灣翔龍灣熱賣，如果趕得切喺今年年底前入賬，全年業績應該好有睇頭。此外，集團近年積極發展內地業務，不斷增加燃氣同水務項目，部份項目已步入收成期，未來增長動力強勁。大股東李兆基今年密密增持，應該有啓示。
圖表上，中煤6月中由16.65元低位反覆上揚，8月底升勢加速，上星期一最高見18.56元，近日雖有整固，但技術走勢未變壞，中長線仍然向好。呢隻股唔啱短炒，有耐性先至好上車，中線睇20蚊，跌穿17.80元先止蝕。