呢兩日，四叔李兆基同佢嘅親朋員工認真頻撲，前日啱啱去完城大，同班大學生玩足成個下晝；噚日又走去大圍，出席由佢創辦嘅仁安醫院搞嘅活動。雖則咁多嘢玩，但佢好似未滿足，靜雞雞咁同華華講：「一年內娶新抱」，華華即刻問佢，係咪么仔家誠已經實實在在向佢報咗喜？點知佢笑笑口話：「未呀！係我想快啲娶新抱咋！」老人家都開到聲，睇怕李家辦喜事之期不遠矣！
出動四季酒店設計師
四叔做地產同酒店叻唔使多講，估唔到經營私家醫院都咁在行，事關佢間開咗十二年嘅仁安，最近擴建豪裝完工，噚日搞開幕禮，事前仲專登帶一眾傳媒，參觀新設施同病房。唔係講笑，啲病房直頭豪華到似豪宅，夠晒大之餘，仲有埋按摩大浴缸，華華差啲以為自己去錯咗嘉亨灣。
華華八到，負責今次擴建設計嘅設計師，係之前幫四季酒店做設計嗰位，唔怪之得一直攞住個私人水壺飲水嘅四叔，都話幾滿意。佢參觀嗰陣，最有興趣就係病房入面嗰張可以變成椅嘅床，差啲睇到唔捨得走。
私家醫院要望天打卦
四叔話，呢廿幾年來，都冇人好似佢咁，投地起私家醫院，事關政府攞晒啲錢資助公立醫院，私家嘅就自己望天打卦，間醫院開咗之後，佢連本帶息用咗10億，到呢兩年，先話有番啲回報。四叔喺台上係咁呻，台下到賀嘅衞生處處長林秉恩，同埋醫管局主席胡定旭，都只係一味喺度笑。
李華華
[email protected]