早排李耀祥家族成員就賣唔賣深井龍圃塊祖業地鬧到上晒報紙,有成員講到明會捐塊地出嚟畀市民享用,加上有環保團體插手,搞到買家最後縮沙費事煩。當時市場勁傳買家係新鴻基地產(016)。
點解市場會認為買家係新地呢?皆因龍圃附近嘅浪翠園二期同四期塊地,係新地喺87年同89年向李家後人買入,而三期塊地,部份亦屬李家嘅。至於新地前日高價搶奪嘅青龍頭地皮,前面嘅小龍別墅,原來都係新地喺87年用1800萬買番嚟。所以話,之前李家賣龍圃地,新地瓜田李下,自不然成為「最大嫌疑買家」啦!
好嘞,講番新地話要掟2.5億去合併發展青龍頭塊地同小龍別墅塊地,蘭西計一計,即每呎樓面成本要成1.3萬蚊,但兩塊地嘅平均地價成本都只係每呎5000蚊左右,咁即係話建築費、利息同裝修費等等,要成8000蚊,比起𠵱家頂級豪宅都係3000至4000蚊,零舍貴過人。嘩!唔通新地要起金屋,如果唔係,一定要炒咗揸數嗰個。
電郵地址:[email protected]