雖然距離年底離任仲有三個幾月，機管局行政總裁彭定中噚日出席美商會午餐會時，就預先講出臨別感言。
佢話，六年任期內，最難忘係03年沙士襲港，短短幾個月旅客數目減少一半，雖然經歷慘痛，但考驗咗香港嘅能力，對港人係一大教訓。另一單係01年911事件，機場要配合做較嚴格嘅保安檢查，搞到排晒長龍，所以佢話居安思危好重要。
彭總裁雖則話就嚟走，但係對香港機場未來規劃仍然好着緊，雖然現時兩條跑道仲未飽和，但佢話𠵱家有需要研究起第三條跑道，以應付未來增長嘅需要。不過，要起第三條跑道，造價可能唔平，因為要喺機場島北面挖淤泥填海，肯定貴過之前嘅第二條跑道，佢話機管局為呢個方案嘅可能性做緊研究，明年會諮詢，睇吓社會點睇呢項投資。