就快輪到PS3同Wii登場，來勢洶洶，早出一年嘅XB360都要搞搞新意思搶客仔！微軟憑藉最有優勢嘅Live網上架構，再配搭快將推出嘅視像鏡頭LiveVision，玩盡機迷個樣，以後每個參與者嘜頭都會同時喺電視度出現，邊個輸咗黑口黑面，「無品樣」即時現形，熱鬧度跟同枱互鬥一樣咁激！記者：許福合 攝影：陳偉強
面對面玩
輸贏有樣睇
《UNO》一向都係經典卡片遊戲，一班人圍埋一齊，唔係鋤大D，就梗係玩《UNO》，喺XB360現時就可以喺Live上下載《UNO》試玩。XB360版《UNO》可以四人圍埋抽，基本玩法都差唔多，不過當抽到「Wild」卡，可以轉色之餘，仲可以揀埋跳卡或反方向出牌，規例同傳統玩法有啲唔同，不過《UNO》規例一向好有彈性，要適應都唔難。配合LiveVision，仲可以睇到另外三名對戰玩家個樣，真係同面對面玩無咩分別，任何生鬼表情都可以一眼睇晒！
安裝容易
直拮USB即玩
講番LiveVision個硬件規格，都算不俗，能支援640×480解像度（每秒30格），只要用一般寬頻網絡，上Live玩已經好流暢，同時亦可拍攝相片，好似Live內所使用GamerCard，玩家就可以使用LiveVision拍下自己個靚樣做卡片，而且仲可加16種特別效果。安裝方法好簡單，就好似電腦一樣，插入XB360前面嘅USB介面就完成，好簡單。
現場試玩
各有異相
見到XB360新出嘅LiveVision，第一眼只當佢係個普通Webcam，但當Winnie、Nisuki、Annie同Ivy等靚女了解真相後，立即對LiveVision好有興趣，仲好似賭神上身咁埋位試玩。
Winnie打到手舞足蹈
Winnie自認玩《UNO》由細玩到大，估唔到上Live玩技術仍在，唔使一陣就俾佢贏咗幾鋪，唔怪得佢咁興奮，打到手舞足蹈，佢就話雖然規例同玩慣嘅有啲唔同，不過好容易適應，而且當大家都用LiveVision，可以見到大家表情，見到有人拎住十幾張卡個慘樣就好笑。
Annie要拍得靚啲
雖然玩《UNO》時，唔會Show好大個樣，不過貪靚Annie打打吓，發覺鏡頭位置唔係咁好，拍得佢唔夠靚，於是喺其他3個人等緊佢出牌嘅時候，都一於少理，先校正個鏡頭，拍個靚樣先。
Nisuki唔夠打搵幫手
真係估唔到，外表精叻嘅Nisuki講到玩《UNO》，竟然無咩心得，經常被人炒，愈輸愈多真係打到無心機，喊晒咁口，最後連隔籬Ivy都睇唔過眼，專登過嚟教佢玩，不過可能天份所限，仍然無咩起色。
Ivy《UNO》高手
另一位Ivy同樣令人意外，估唔到佢外表斯文，牌章咁高，睇佢坐定定，就連贏幾局，可以話同Winnie棋逢敵手。不過打打吓，突然發現佢個畫面唔見人，先知原來佢去Nisuki嗰邊幫拖！
糖水挑機
有位記者叫Michael，見到粥粉麵飯四位靚女玩得咁開心，亦都心思思欲一顯身手，不過睇佢企法硬直，似乎有啲緊張，喺唔專心狀態底下，結果慘敗收場！
同場加映：Fing手過關當運動
除咗《UNO》之外，同場亦都Demo咗《TotemBall》，玩法就仲特別，透過LiveVision鏡頭，可以偵察玩家動作，玩法簡單，只要舉起雙手，鏡頭會偵察到雙手動作，當雙手向上推，遊戲角色就會前進，相反就會倒後，一上一下就轉彎，目標係收集足夠道具過關，玩遊戲就好似做運動一樣。
人樣Key落遊戲度
記者會上亦透露咗啲新遊戲消息，比較特別係應用咗攝臉技術，可將人臉套用到遊戲角色上，雖然連Demo都未有，不過聽落都幾吸引。
