愈嚟愈覺香港有啲路牌「陰」人「陰」到七彩，例如你要由A點去B點，明明有條快好多、唔使喺工廠區塞車嘅路佢唔同你講，反而叫你去行條隨時塞到動彈不得嘅工廠區道路，又或者係個路牌舊到甩晒色甚至被樹遮晒，想睇都睇唔到……如果要逐一數出嚟，真係數3年都數唔完。
不過，唔少駕駛者都覺得最大整蠱嘅肯定係巴士專線，好似喺《香港討論區》中，網友3143所開嘅「佢都算好彩囉……咁都無事」嘅Topic中，見到有部ToyotaEchoVerso走咗入銅鑼灣鵝頸橋底嘅巴士專線，想走都走唔甩。不少網友都話呢位司機好彩，好似ONE2FEE嘅回覆話：「……上次喺灣仔入咗巴士線都唔知，好彩後面個巴士司機閃我。」另網友calvinchiu則話：「嘩，唔講真係冇為意……」
查實，呢啲巴士專線其實係有時間限制，例如朝7朝9，又或者只係上下午繁忙時間，雖然地下清楚寫明係巴士專線，但路牌往往要去到專線嘅入口先睇到，而且仲要係成堆字密密麻麻，你叫揸緊車嘅人點睇呢？點解有關當局唔選擇使用一啲設計較簡單嘅路牌，列明巴士專線生效時間，兼且喺巴士專線入口前200或300米豎立更多路牌，清楚講明前方係巴士專線，請盡快轉線，免得因誤闖而被抄牌兼罰款呢？
記者：鄭達基
討論網址： http://www11.discuss.com.hk/viewthread.php?tid=2278323&extra=page%3D3