《阿甘正傳》你睇過啩？湯漢斯個樣係點你知啩？前日我就喺山頂撞見佢！係咪呀？梗唔係喇，查實撞到嗰個係翻版阿甘Steve。佢無論外貌同聲線都似到阿甘十足十，戙喺餐廳門口做人肉生招牌，仲任影唔嬲。想阿甘親自餵你食朱古力，趁上山頂撐場喇！
記者：黃若茵
攝影：周旭文
模特兒：Natalie
清一色用白蝦
電影《阿甘正傳》裏面，阿甘好朋友布巴講過呢句對白：「蝦是海中之寶……你可以將蝦煮、灼、蒸、釀、烤……」所以「阿甘蝦餐廳」最主打嘅就係一系列蝦菜式，大廚Frankie話：「多數餐廳用虎蝦，我就用白蝦，因為白蝦蝦肉夠甜，食落更香。𠵱家我用中國養蝦，因為今年中國養蝦養得靚，我揀蝦都好似揀酒咁，要睇年份，睇吓邊年最好，今年揀中國蝦，下次入貨就要重新揀過㗎喇。」除咗蝦，餐廳仲用一種叫「卡真」嘅調味料，究竟係乜？「卡真特點係香同辣，係美國南部人經常用嘅調味料，用嚟煮海鮮可以帶出鮮味，阿甘住嘅阿拉巴馬州就屬於美國南部，用呢種調味料，可以話配合番餐廳主題。」
阿甘上身但講嘢快
未入門口，你會聽到有人同你講：「Life'saboxofchocolate！」望望，Steve果然勁似湯漢斯。左手拎住行李箱，右手捧住盒朱古力嘅佢話：「20歲開始，好多人已經話我似湯漢斯，記得有年萬聖節，我索性打扮成阿甘。10年前第一間『阿甘蝦餐廳』喺美國開幕，我就開始以阿甘造型出現餐廳。」翻版阿甘舉手投足、說話聲線都激似阿甘，除咗說話速度，Steve解釋：「阿甘講嘢實在太慢，會好悶㗎。我會用番一啲戲入面嘅對白，令人聯想起阿甘。𠵱家我扮佢都扮到上晒身，好自然就會做出佢嘅動作同表情。」想睇翻版阿甘，今個星期六係最後機會，當日餐廳正式營業，亦係佢最後一日留喺香港。
甘黃椰絲炸大蝦$152
大廚Frankie：「美國椰絲本身帶甜，蝦肉加橙果漿同芥末子一齊炸，味道甜撞甜不過好夾，椰絲炸過好脆口，保證甜到入心。」
炭燒酒香馬凱魚配鮮蝦$168
用卡真煮馬凱魚同白蝦，另加蜆水、紅洋葱同波本酒做波本汁，混埋海鮮一齊食味道好突出。薯茸加入鮮忌廉，咬落好鬆化。
漁夫海鮮桶$188
海鮮桶有蝦、龍蝦尾及馬凱魚，全部酥炸。建議龍蝦尾點牛油醬，油滑不膩口，炸蝦同馬凱魚則點辣醬，更加惹味。
廚師焗海鮮飯$110
Frankie：「加入巴馬芝士忌廉汁，再加Cheddar同JackCheese，芝士味夠濃。用嘅係泰國茉莉香飯，入口有陣陣茉莉香。」
紐約牛扒配釀焗薯$220
Frankie：「我哋試咗14間供應商先揀到呢隻西冷牛扒。」入口脂肪咇晒油，令質感更爽，牛肉本身夠腍，我極力推介。
勁多Fans
睇埋裝修
搵食攻略
阿甘蝦餐廳（28492867）
地址：山頂凌霄閣三層304-305號舖
營業時間：周日至四及公眾假期11:00am-10:00pm；周五、六及公眾假期前夕11:00am-11:00pm
交通：中環大會堂乘1號綠色小巴直達
全店座位：170個，設吧枱
人均消費：$200-$240
最好賣：炭燒酒香馬凱魚配鮮蝦