頸患復發心亂跳<br>馮仁昭四圍超:病貓鄭融哭爆瘡

頸患復發心亂跳
馮仁昭四圍超:病貓鄭融哭爆瘡

鄭融噚日頭戴冷帽,去商台接受《叱咤樂壇》訪問,睇嚟佢好似冇乜點化妝,個樣仲冇厘精神,鄭融話近日為咗宣傳新歌《紅綠燈》同籌備新碟,搞到精神緊張,最慘係因為壓力太大,令額頭狂爆瘡,為免加劇瘡患,所以佢唔敢化妝,仲要戴冷帽遮醜。

拒睇心理醫生

記者見到鄭融個楚楚可憐樣,於是連聲安慰佢,叫佢唔好咁緊張,點知鄭融一時感觸,即場喊起上嚟,仲要求大家唔好影相,之後佢就衝入洗手間平復情緒,過咗一陣再返出嚟畀傳媒影相,對住鏡頭強顏歡笑。
鄭融話:「我有睇醫生,醫生叫我放鬆啲,佢話因為我太緊張。𠵱家一星期要睇幾日醫生,又要做物理治療醫條頸嘅舊患,又做瑜伽,心跳又好快,自己都驚有病,出唔到碟做唔到嘢。」
鄭融又話:「其實公司冇畀壓力我,但係我都冇搵人傾偈,連好朋友薛凱琪都冇搵,因為佢都好大壓力,不過我冇打算睇心理醫生,因為我太硬頸,睇都冇用啦!」

不施脂粉嘅鄭融噚日戴冷帽遮額頭,現身商台接受訪問,講講吓突然喊起上嚟,仲擰轉身叫現場記者唔好影佢(圖)。

鄭融出道冇耐經常以性感小野貓姿態亮相,又唱又跳好鬼精靈。
資料圖片