43日行程中，最驚險係入去「塔克拉瑪干沙漠」，呢度係世界第二大沙漠，好難行，過往有好多車入到去，都會壞車收場，走唔番出嚟，死過唔少人，就連當地政府都驚我哋今次出唔番嚟……一邊聽車主親述今次的四驅之旅，一邊還以為自己聽緊恐怖探險電影。除以上驚險「劇情」外，今次為期個半月的四驅之旅，車隊還做了香港車壇上三大創舉。
記者：黃婉冰
相片提供：S&PAutoLtd.
8部全由香港人駕駛的四驅車花了個半月時間，從香港出發，途經廣東、貴州、雲南等，直去西藏和喜馬拉雅山，再折返香港，走勻半個中國咁刺激，難怪搞手馬大立都話從來未有車隊試過。「今次揀呢條路線，係因為西藏鐵路啓用，我想趁環境仲未受破壞，帶屋企人同朋友去走一轉，而且我想畀一班四驅車友試試真正駛四驅車行沙漠的滋味。」
創舉一 2日橫越塔克拉瑪干
用四驅車橫越沙漠並非新鮮事，但今次8架大型四驅車直闖的塔克拉瑪干沙漠，是全球第二大的沙漠，出名難行，好多人因此有入無出。「兩個月前就有個探險家揸住架四驅車入去，點知架車入到去頂唔順壞咗，個探險家就咁死咗喺入面……從來無人能入去，安全完整走出來，沙漠來回路程一共有450公里，今次前後用咗2日時間行完。我哋可以成功，因為將所有車都改裝過，呢種改裝技術係用嚟行撒哈拉沙漠，加上換晒270升油缸，換埋OBERON偈油，所以先可以捱得到咁耐，但因為啲沙太鬆，車胎一路行，一路俾啲沙啜住，我哋要不斷掘沙，雖然困難重重，但總算順利。當地政府幾驚我哋出唔番嚟，所以頒咗張證書畀我哋，幾好笑呀。」
創舉二 首隊香港車揸到後藏
他們成功走出死亡沙漠，今次亦做了其他創舉，就是全港首次有車隊進入後藏（即喜馬拉雅山麓的一帶）。「由始至終，香港未曾有人揸車直入後藏，淨係申請入境就用咗半年時間，入面有好多地方可行駛，但唔可以停車，加上為咗遷就小朋友放暑假，響7月雨季出發，啲路比平時難行，但估唔到嬌生慣養嘅香港車主居然頂得順，其中一架車條大陣爛咗，成班人用咗三日時間就換咗條新，呢項都算係最快換陣創舉，多得鳳凰衛視同四川中達雷克薩斯協助先可以完成呢個旅程。」
創舉三 直踩6,000米珠穆朗瑪峯
「全程最辛苦莫過於直闖珠穆朗瑪峯，一路上，隊友出現高山症，有啲因為路途太艱辛而變得脾氣暴躁，幸好各人都可以和氣收場，我無嘢驚，最驚係返嚟朋友都無得做，成個過程嘅辛苦度唔係筆墨可以形容，好彩佢哋好快又無事。除咗要克服高山症之外，一路上山，好多時都要經過啲懸崖，條路只得一架車咁闊，真係要好小心先駛得過，如果一不留神，成架車就會跌落崖，好彩個個都玩慣，所以問題唔大，今次我哋成隊車去到海仗6,000米高嘅珠穆朗瑪峯，已經係汽車可以去到嘅最高點。」
