港股前日下試50日線後高收，昨日食住前晚美股嘅升勢，輕輕鬆鬆上咗10日線同20日線嗰頭，因為「㗎仔」個市玩飄忽，美股又去到阻力位，好友同淡友惟有睇定先，實行「敵不動、我不動」，好彩啲油價碌完又碌，啲炒家都有揀股票嚟炒，個市先至冇咁悶。
嚟到這個位，單日博恒指升跌，贏輸機會一半半，欠值博率，玩指數輪，可以睇多陣先，搵個好時機先至入市。𠵱家個市仲有唔少輪可以炒，講當炒，梗係同油價有關嘅輪，另外隻招行（3968）嘅招股反應熱烈，啲國內銀行股亦蠢蠢欲動，揀輪可由這兩瓣入手。
交行C輪4992：喺咁多隻國內銀行股入面，交行（3328）嘅波幅向來較大，啲輪自然都好炒啲。
交行近幾日搞極都升唔穿條20日線，昨日終於搞掂，企喺5.02元收市，周線圖個樣唔錯，今次炒上，破5.16元嘅機會唔細，下個目標5.40元。交行C輪4992昨日收36.5仙，仲有93日先到期，槓桿率13.8倍（有效9.6倍），引伸波幅21.9%，正股升上5.16元，4992料見46仙，正股見5.40元，隻輪應該喺63仙樓上。39仙樓下買入，正股跌穿4.90元止蝕。
另一隻可考慮嘅交行C輪係4594，昨收42.5仙，槓桿率11.8倍（有效6.8倍），引伸波幅30.2%，對沖值0.575，正股升上5.16元及5.40元，4594嘅目標價係50仙同64仙，44.5仙樓下買入，止蝕參考同4992一樣。
俊 樺