樹仁輔導及心理學系畢業生Yuki，經常去銅鑼灣「榮記粉麵」打躉。咦，樹仁喺北角寶馬山，附近無嘢食咩？推薦間近啲嘅好喎，點知佢答：「北角啲嘢食嘛……唉，都係落番山食好啲。」得，明白。落銅鑼灣搵食咪好唔方便？「又唔係喎，百德新街有25號Van仔上寶馬山，所以好近㗎咋。最高峯時期，我日日嚟『榮記』食㖭。」嘩，仲密過見男友仔。
「榮記」最出名係車仔麵，Yuki讚不絕口：「湯底超正，腩汁好濃好夠味；豬紅夠滑，雞翼尖好入味，最正係佢本身有菜底，變相食多樣餸，埋單又平啲，哈哈。」即刻捉鄭師傅問兩句，佢話：「最緊要滷水做得好，用足10幾種材料熬湯底，配餸浸一陣就會好入味。豬紅、蘿蔔要整得好食，除咗煮法，保存、揀貨都好重要。」查實我都係「榮記」Fans，車仔麵話晒都係香港地道食物，應該支持，臨走Yuki補多句：「食完車仔麵隊樽支裝可樂，感覺超正。」我絕對認同。
記者：蘇振鵬
攝影：陳盛臣
榮記粉麵（25763688）
地址：銅鑼灣渣甸街43號地下
