恒基四叔李兆基，每次捐錢做慈善一定出動家人老友助興，噚日城大學生宿舍李兆基堂命名，都唔例外！除咗經常露面嘅阿女佩雯、女婿李寧，同埋么仔家誠之外，連好少蒲頭，生得亭亭玉立嘅外孫女李敬恩，都到場撐公公，成場乖乖坐喺四叔身邊。
咪睇四叔幾十歲人，原來佢都好鬼貪靚，入場未坐定，就即刻喺衫袋度，攞把私家梳出嚟，執番靚個頭，先至畀大家影相；至於佢位外孫女都唔輸蝕，十隻指甲全部做晒花甲，聽見華華讚佢，仲笑得鬼咁開心，兩公孫都咁貪靚，唔通呢樣嘢有隔代遺傳？
做完開幕命名儀式，四叔就同埋屋企人一齊殺上學生宿舍巡場，咁啱撞到一班宿生玩緊大富翁，四叔即時童心大發，坐埋班學生哥身邊，玩埋一份，雖則只係玩咗一陣，但已經𠱁得班後生仔鬼咁開心！梗係啦，有億萬富豪陪玩大富翁，呢啲機緣好難得。
讚宿舍地段靚
見到做地產嘅四叔，就梗會問吓佢對賣地嘅睇法，四叔一聽到話幅地賣咗5千幾萬，即刻話買間別墅都過億啦，呢啲咁細嘅地，冇乜代表同指標性。
佢又大讚城大嘅宿舍，位處半山，景靚空氣好，咁嘅地段，呎租起碼要成廿幾蚊，家吓班宿生只係畀十分一租值，就可以住喺度，佢話都不知幾羨慕班學生哥。