曼城季前一口氣簽入8位球員，點知簽返嚟嘅好似達保同哥拉廸咁，唔係臭馬就係「隱形人」，紀律差之餘又冇建樹。對於領隊皮亞斯嘅眼光同領軍能力，我求大俠都抱有懷疑態度，但唯一要讚吓嘅係，佢搵咗只得18歲嘅米卡李察士打正選右閘，呢個𡃁仔上位有望呀！
曼城多臭馬皮亞斯頭痕
米卡李察士係曼城青訓產品，今季佢壓倒前英國腳米斯、突尼西亞國腳查比斯同中國國寶孫繼海等人，霸住正選右閘一席。睇番米卡李察士近幾場嘅表現，呢位黑人夠身位之餘，仲成日嘜到對手一棟都冇，佢砌低米斯幾位打正選唔係符碌㗎。
不過米卡李察士脾氣認真一般，佢上場作客雷丁喺下半場被換走，即刻面燶燶口噏噏兼擲波衫，仲搞到俾領隊皮亞斯大嗌叫佢收嗲。其實曼城陣中大把臭馬，好似今季由拉素加盟嘅達保，喺雷丁場波就請纓擅自射罰球，場邊嘅皮亞斯睇到即時大發嘮嘈，不停問在旁嘅助教「點解係佢射㗎？」
曼城𠵱家排11位好似好穩陣，但其實隊波有好大危機。球隊近4場聯賽只入一球12碼，顯示攻力好有問題。睇嚟皮亞斯再唔發功，隨時季初都要打護級戰。
「皮亞斯球員時代就威威，做領隊就冇咩人畀面，搞到班臭馬個個胡作非為，都係佢自己入錯貨所致；求大俠建議皮亞斯應該同班球員溝通吓先，唔係隨時執包袱。」