呢幾日喺幾個大型金融財經BLOG，最多人講嘅，除咗應唔應該學班C9（即係師奶）拎表抽招行（3968）、京客隆（8245）外，最令網友議論紛紛就係表演「花式插水」嘅亞科資本（8088）！
單係《香港討論區》就至少有十個八個講8088嘅標題，怨氣之重，堪稱近期之冠，可見好多「網友」衰喺呢隻股上！
其中網友MN77嘅「完美莊家股範例教室」就列咗8088嘅事件簿，佢話莊家喺04年8月3仙水平開始收貨，但冇乜人留意（因為成交細），同年10月開始發力，直至05年9月才有人注意到（相信係有人出嚟放風），到今年3至5月莊家開始發力，6月炒上$1.12，7月派貨，到呢幾日因為見冇乜人接就洗倉。MN77嘅結論係「大家要承認呢隻係完美莊家股而唔係前景光明股」。
咁其他網友點睇？kenngkukoc話：「講得好，但點解唔係兩個月前post上網？」mowom話：「用兩年時間布局，個莊都好有耐性......」
hkice2就話：「你夠膽就下星期爆升，係我傷口上灑鹽......次次蝕放都係咁......8088班股東小心有報應!!!」而lamqqq回應：「股東報應係大魚大肉、金銀滿屋、香車美人、食雪茄時鼻孔向你放毒氣......」oanoda話：「仲慘過玩輪，玩輪都好過玩呢隻嘢！」
到咗呢個田地，班網友想做啲乜？係$1.04、$0.94、$0.85都入咗貨，跌到$0.8先至走嘅peggybee1話：「真係唔知佢想點......想打電話去問一問間公司，有無人可以俾電話我？」咁仲應唔應該追？RAY25905話：「再買就唔係跳車，係跳樓......」
再睇番8088本身，除咗7月份公布過話有個美國天然氣項目同埋申請轉主板之外，表面上係無咩事發生過，直至噚日，先至因應股價跌發表聲明，董事會梗係話唔明咩原因囉！