噚日華華先講完，馬會近年搵唔到人入場，想睇吓計仔多多嘅新任主席陳祖澤，有乜奇招吸客，跟手就聽到有人出錢幫手，邊個？咪就係數碼通囉！華華八到，數碼通會攞200萬出嚟，贊助跑馬地百萬挑戰盃賽事，當中100萬就係頒畀成績最好嘅三匹三班馬嘅馬主，而另外100萬，就係用嚟引馬迷入場。
點引法？梗係用錢啦！今日開始，一連十八場星期三夜馬期間，最快依指示send短訊去指定冧巴嘅五百個用戶，就可以贏到100蚊電子禮券，之不過呢張禮券，一定要去跑馬地馬場先可以兌換成現金券，換咗之後用嚟投注又得，喺馬場內飲飲食食都得。華華唔知咁係咪可以推高入場人數，但有人肯出錢搞花臣，陳主席都應頒番面錦旗畀人哋！