無綫台慶頒獎禮將喺11月開鑼，每年頒獎禮前夕例牌傳出唔少爭獎是非，前晚佘詩曼就夜會無綫兩大高層陳志雲同樂易玲開飯局，難免令人聯想到同台慶女主角獎項有關。
食足兩粒鐘
前晚阿佘、陳志雲同樂易玲喺尖沙嘴洲際酒店開餐，食足兩粒幾鐘，到夜晚十點左右先拉隊走人，一行三人企喺酒店門口等車嗰陣仲雞啄唔斷，勁好傾。
話時話，今年台慶女主角獎確有一番惡鬥，阿佘參賽作品有《火舞黃沙》同播緊嘅《鳳凰四重奏》，不過佢要面對兩位勁敵，一個係《女人唔易做》嘅鄧萃雯，另一個係為拍攝《肥田囍事》而增磅嘅肥杏胡杏兒，套劇仲趕及下月推出，難怪呼聲好高，所以阿佘要攞獎亦非易事。
噚日馮仁昭同阿佘傾電話，佢話早幾日喺公司撞見陳志雲同樂易玲，大家傾開話好耐冇一齊食飯，所以前晚就約出嚟食飯傾吓偈，佢仲話：「𠵱家先9月，咁早，我冇諗過會令人有任何聯想，公司仲有好多劇都未出。」
