亞洲股市在「911」5周年全面下瀉，但美股都算企得穩，前晚埋單計數，都係幾點上落。
昨日港股「徇眾要求」（周街都睇恒指下試50日線），推向50日線，恒指最低報16921，雖然掂唔到50日線，但相差21點，技術上都算試咗位，恒指迅速反彈，收市企喺17075，追番126點。
個市要彈，始終都要靠兩隻重磅股，滙控（005）報收138.90元，升0.57%，中移動（941）報收51.65元，升1.7%，由於兩隻股逼近阻力位，啲炒家追輪都唔算太積極，不過，如果兩大成份股今日繼續炒上升破阻力，啲C輪可能升到癲，當然，到時其他股份都會受惠。
富士康C輪2474：隻恒指新貴富士康（2038）前日下試10日線後，昨日回升，報收22.95元，升3.8%，突破阻力降軌，美中不足係成交未見大增，不過，走勢已經好番，有條件上試24元，成交應該會多番。富士康C輪2474昨收41仙，槓桿率5.6倍（有效3.6倍），引伸波幅49.4%，可以買番啲，正股上試24元，隻輪可以上試48仙，正股跌穿22.30元，止蝕。
駿威C輪9354：汽車股走勢好，駿威（203）有鑊氣，股價升咗6.8%，報收2.81元，成交8600萬股，唔係有大盤殺入，冇理由成交咁勁，睇嚟上試3蚊無走雞。隻C輪9354報收61仙，有效槓桿3倍，引伸波幅69.7%，正股升上3蚊，9354應該值73仙以上，買番少少，正股跌穿2.70元，止蝕。
俊 樺