家吓小朋友真係愈嚟愈有福，細細個就有自己嘅小天地，房內有齊電視、電腦，應有盡有。
廸士尼就睇中呢個市場，噚日同升岡簽訂特許經營權協議，未來幾年，升岡負責幫廸士尼開發、製造同推廣廸士尼嘅電子消費品，仲專攻兒童市場，不過暫時只喺美國、加拿大、墨西哥同波多黎各銷售。
升岡主席劉錫康喺記者會上簽完呢張約，全程笑唔停口，由下年1月1日起，升岡就會付運150萬件廸士尼產品去美加等地，𠵱家仲做埋分銷，毛利率肯定好過𠵱家嘅14.5%，就連投資約2000萬，喺下年擴建完成嘅番禺廠房，都係主力製造廸士尼產品，產能由1100萬件提升到1500萬件。
呢批電子消費品包括電視機、DVD機、鬧鐘收音機等等，產品嘅推出次序，順次為廸士尼公主系列、反斗車王、魔盜王、同Tinkerbell。睇嚟班家長都要儲定錢喇。