勁，真係勁！新一屆巴黎車展要到9月28日先正式揭幕，但家陣各大車廠已經放晒風話會擺邊幾款車；而作為東道主嘅法國Citroen都一樣咁做，而且仲爆咗料話係部玩柴油混能嘅C-M囗tisse概念跑車，實行大力Sell環保！
記者：鄭達基
Hybrid系統以柴油作核心
一般混能汽車都係用汽油加電池作配搭，但今次Citroen推出呢部C-M囗tisse概念跑車就好唔同，主力核心係一台能輸出208匹馬力嘅V6HDi柴油引擎，但廠方並無公布呢台引擎嘅容積係幾多，而後車軸上亦設有電馬達，可輸出20匹馬力，附以6前速自動波箱，0至100km需時僅6.2秒，極速可達250km/h。咦，照數據睇嚟，部車嘅Performance拍得住啲SuperCar喎！
潮Look型櫳坐4人
車長達4.74米嘅C-M囗tisse，用嘅係超扁平流線型車身設計，無論哪一處都有女士嘅曲線美，鬼面罩旁邊係由LED燈組成嘅頭燈，型之餘仲可以同你照清照楚前面條路。車廂方面亦都大玩CyberFeel，銀色閃令令嘅裝飾隨處可見，座椅更係獨立桶椅設計，4位乘客可各自佔上一座椅，唔使怕同人逼餐懵。
