一網股事:百仕達可短炒

一網股事:百仕達可短炒

百仕達(1168)今年4月頭最高3.125元,在惠理基金大幅減持嘅消息影響下,股價反覆回軟,6月中最低見1.29元,之後喺1.34至1.65元之間橫行,圖表上形成圓底收集形態,上星期升破降軌,最高見1.71元,又見散戶上車博見底。隻股噚日收報1.62元,跌3仙。
「Yahoo討論區」內,網友littlestar0422話:「噚日1.68入,1.70放唔到,𠵱家……唉。」另一蟹民leokchui亦話:「我都喺昨日1.66入咗!現似乎冇乜力!點搞?」Lolento就比較冷靜:「1168今日明顯喺1.61/1.62整固!整固查實好重要,可讓OldTraders獲利回吐,新Traders可低位買入,咁先健康!假如冇明顯整固的話,股價一路升,跌起上嚟一樣好兇!初哥一定好大鑊!如無意外,1168明日又會升番!」
近排內地地產股反彈咗唔少,百仕達相對落後。隻股上星期破位時,成交明顯較之前兩星期為多,係好訊號,MACD已重上0線兼雙牛向好,前日雖然升至1.71元高位後以「墓碑十字」回吐,但保歷加通道中軸1.50元支持力甚強,RSI升軌仍完好,短炒無妨。料整固後再試1.71元阻力,破位後先睇1.90元,跌穿1.50元止蝕。