大約兩個星期前，有老友打電話畀孫柏文，話有意思參選從政，想聽吓我意見。孫柏文初時以為佢講笑，點知佢好認真咁問：「你覺得我點做先可以贏到選舉？」好，難得你咁認真，孫柏文就用隻金手指點條好路你行。
孫柏文首先同佢分析，今時今日，諗住靠政黨增加知名度參選嘅年代已經冇咗，黨入面成班老patpat，排隊有排都未輪到你，入政黨係嘥時間。一句到尾，要好快咁增加知名度，最好嘅方法莫過於做時事口水佬。就好似鄭大班喺商台做節目咁，孫柏文細細個嗰陣，每朝早扭開收音機，都會聽到佢大條道理，大大聲咁鬧到啲官「狗血淋頭」，不知幾過癮。
要做到好似鄭大班咁當然都唔易，起碼你要對每個大issue都有立場、有邏輯，同埋唔好盲目跟主流，咁至會令人聽得過癮，心服口服。孫柏文同佢講，就以「阿嬌偷拍事件」為例，如果想靠評論呢件事出位，就千祈唔好跟主流講埋啲「行」嘢，乜嘢「《壹本便利》係錯嘅」，乜嘢「傳媒永遠是對的」，肯定死硬。
老友聽到一頭霧水：「撐邊面都死，咁應該點講呀？」問得好！如果你能夠講到喺成件事裏面，阿嬌同《便利》都係俾人拉落水嘅，然後再集中討論吓將來應該點防止呢種事再發生，咁就掂喇。老友聽完之後deadair咗一陣，然後深呼一口氣：「Well，我會盡力試吓。」
兩個星期後（即係噚日），朋友專登踩場嚟搵孫柏文，仲叫我坐定定唔准笑，然後企喺度好正經咁話．．．．．．
「1998年1月，當時美國嘅《Newsweek》雜誌收到一則獨家料，話總統克林頓同白宮見習生萊溫斯基單嘢，搵到條染有克林頓精液嘅裙做證據。班編輯經過一番討論後認為，由於克林頓同萊溫斯基都係成年人，呢啲私人嘢冇新聞價值，所以決定唔登。好可惜，當時已經有互聯網，結果一星期後，呢宗醜聞就俾一個叫drudgereport.com嘅網站率先爆咗出嚟。
「我哋生活喺科技發達嘅年代，所有嘢都有機會俾人拍低或者影低，咁即係話，只要有人刻意向公眾發放，只要喺電腦㩒個掣就搞掂，到時一夜間全世界都會睇到。既然冇法例可以制止到呢樣嘢發生，所以唯一保障自己嘅方法就係凡事要小心，唔好俾機會人哋拍到或者影到先至係最緊要。
「阿嬌被《壹本便利》偷拍事件，就算法例限制到印刷媒體唔出版呢類偷拍嘅相或片段，但只要有人將呢啲相或者片段擺上網，當局就已經束手無策。其實，現時法例已經保障到阿嬌，如果影到呢啲相嘅唔係《壹本便利》，而係網站，就好似當年克林頓單嘢咁，如果網站仲要影到嘅唔止係阿嬌條bra帶，而係更重要部位，佢哋肯定唔會幫阿嬌打格，到時擺上網後果仲大鑊。
「既然不幸嘅事已經發生咗，歸根究柢都係馬來西亞雲頂高原保障私隱設施不足嘅錯，雲頂高原太疏忽，『老定』以為阿嬌只係喺後台換件面衫，肯定唔會除清光，就算影到，都濕濕碎同泳衣相差唔多，結果就係咁衰咗。雖然呢個純粹個人揣測，但我認為最應該受譴責嘅，反而應該係雲頂高原，因為佢哋嘅保障私隱設施不足，而《壹本便利》正正將呢個漏洞揭露咗出嚟，令以後所有去雲頂高原登台嘅藝人學精。
「呢兩個星期，香港社會就呢件事拗咁耐，根本係浪費時間，雲頂高原只要花區區幾百蚊買塊百頁簾就可以解決到問題。我喺度呼籲各位媽咪，最好提醒吓個女，世上係冇一條法例可以完全咁保障到佢哋唔會俾人影到，杯葛乜杯葛物係冇用嘅，總之以後一世唔影相就冇事。」
老友一口氣咁講完，雙眼發晒光咁等孫柏文開口讚good，可惜我始終忍唔住拍一拍佢膊頭：「細佬，如果你諗住政治自殺，就即管咁講啦，哈哈！」
孫柏文